De 3e Episode: Vors George

1992 waas ’t zowiet; de Kits-Uule ginge häör twee mnaol ellef viere.

Vors Ton verzaamelde ein aantal “prominente” luuj om zich haer, Peter Munnix zaliger, Paul Poel, Peter Krebbeks, Henk Dohmen en toenmalig veurzitter van de Kits-Uule, Boy Swachten, zolle ein daverend twee maol ellef gaon organisere. In taegesjtelling toet ’t huidige drie maol ellef kommetée, ware de leeje van de jubeleum sjtichting ’t ongerling neet gans ins euver de te vare koers. Toch kwame ze toet ein pregram dét veur elk waat wils te beeje had mit als dudelik hoogtepunjt, ein geweldig Caribisch fees oppe zaoterdig aovend. Het ganse sjpeel kreeg gesjtalte in de aaj ITO-sjool aanne Odgerussjtraot oppe Kemp. Veur dees gelaegeheid waas de sjool door ein groep entoesjastelinge omgetuiverd toet ein waarachtig feespelies.

Het waerde ein sjoon fees, mér de ongerlinge vreevel binne ’t kommetée ontaarde oeteindelik ein oeterein valle van ’t Kits-Uulebesjtuur nao ’t fees. Waat ein impuls had motte waere veur de volgende ellef jaor ontaarde zo in ein ongekinde trökval.

Gelökkig sjlooge inkele euvergebleeve besjtuurslede de henj inein om de zaak weer oppe rail te kriege, en toch weer eine nuuje Vastelaovend biej de Kits-Uule op peut te zitte. In de jubeleum Prins, George d’n Eerste van ’t twee maol ellef zooge dees miense eine man mit ein groot vereinegings hèrt. Miense wiej Wilfried Baum, Karel Heldens en Jeu van Montfort wiste George euver te haole in ’t besjtuur zitting te naeme als sikkertaris. Lambert Hoek, vader van de Prins 2001, waerde beneump toet interim Vors/veurzitter.

De Kits-Uule trein begos weer langzaam te rieje!!.

In 1992, op ’t toen tradisjonele pötbal, waas Hans Verstegen, van de gelieknamige muibelrompe febriek, al gevraog om ’t Prinssjap 1993 veur zien raekening te naeme.

Achteraf bleek dit ein golje vraog te zeen gewaes. Vanoet Hans zien femilie, zeen diverse troewe leeje aan de Kits-uule blieve plekke.

Lambert Hoek kós om gezondjheidsraejene ’t roer van de klup neet lang in hénj haaje.

Dét waas ’t mement om George Schmitz te vraoge ’t Vorssjap te aanvaarde, en Hans Verstegen waerde, ondanks zien pas korte ervaring, toet veurzitter beneump.

George vraog ein jaor prooftied, om als interim Vors, zich de zakes eers ‘ns good te bekieke.

Ónger ’t bewindj van Hans en George höbbe väöl aaj aktiveteite ein nuuje impuls gekrege, en is d’r ein scala aan nuuj aktiveteite toet ontplooijing gekómme. De bandj mit de Kaketoes is baeter es ooitj te veure, ’t Kits -Uule “Sjpetterfestijn” kwaam toet laeve in 1995, mer ein dink is altied gebleve: Vastelaovend veur de jeug in ’t Kits-Uule Pelies aan de Aaj Keulsebaan.

Gelökkig bleek hae de sjmaak inmiddels good te pakke gekrege te höbbe, in eedersgeval zo, dét hae toet 2006 ’t Vorssjap van de Kits-Uule haet vervult.

En inmiddels door de Kits Uule is beneumd toet Grootvors

Dét had in 1971 nemes gedach!!