De 1e Episode: Vors Maan

“t gebeurde rondj paose 1969…., in ’t kleine jeughoes aan de Aaje Keulsebaan de kachels ginge stök. Sente ware d’r neet dus d’r mosde d’r aksies komme om ein nuuj verwerming te kinne aansjaffe.

De leiding van de diverse klups sjlooge de henj inein en sjmeede häör planne.

Taege ’t inj van det jaor bedachde sie zich om in 1970 auch ein vastelaovend te haaje om nog get ekstra sente binne te kriege.

Leider Rene van Kessel, van de toenmalige verkennerie waerde toet Prins gemaak. Als kindj waar ich hiejvan nog getuuge, ich zeen Rene d’n eerste nog door ein mit pepier besjpanne hoepel van de buhn aaf de zaal in sjpringe.

Rene ziene sjpreuk waas: “gäëf väöl en dök want os kachels zeen stök”.

‘T Vastelaovesfees waerde ein daverend sukses en so waerde besjlaote om d’r ein jaorliks trok kommend sjpeel van te make. D’r waerde oet de jeugleiding ein raod van ellef samegesjteld. Auch waerde d’r euver ein naam van de nuuj gebaore klup gefillesofeerd. Ze bedachte zich det’se Uule van Remunj ware, mer dan waal die van Kitskesberg. Hiej op insjpelend ontsjting de naam “Uule van Kitskesberg” ofwaal: De Kits-Uule.

Toen in 1972 de nuuje Prins , Hugo, van den Broek, d’n Eerste , aantrooj waerde de Kits-Uule veur ’t eers auch vereerd mit bezeuk van anger vereineginge. Netuurlik mosde d’r auch gesjpraoke waere. So kwaam ’t det toenmalig leider van de jonges hobbyklup, Maan Smeets, toet sjpraeker en eerste Vors van de Kits-Uule waerde gemaak. De eerste “pakke” van de raod besjtinge oet ein wit hemp mit nondesjuuke en ein sjwarte boks.

De Kaketoes die al lang besjtinge vonje ’t sjoon ein jeugklup in haor Riek gekrege te hobbe en besjouwde de Kits-uule danauch als haore “kweekviever”. Vors Maan vonj dit waal sjoon want hae ongervonj det als ein sort erkinning. Vanaaf Prins Jos (Sliepen) in 1973 sjtelde de Kaketoes ein ech prinsepak veur de Kits-Uule ter besjikking taege betaling van ’t symbolische bedraag van ellef golde ellef. Dit ging zo door toet aan Thijs (Wolter) d’n eerste in 1980. Wiej kits-Uule raodslid Joop Smeets aad genog waas om Prins van de grote breurs de Kaketoes te waere, ontsjting d’r ein laegloup biej de Kits-Uule. Leeje sowie: Adrie Vervuurt, Jos Sliepen, en Wim Smeets en Joop Smeets maakde de euversjtap. Maan klopde biej scouting aan veur nuuj raodsleeje. Mit ein man of ach van de scouting aafdeiling “Rowans” waerde de draod weer opgepak. Inmiddels hadde de Kits-Uule blauwe jeskes aan haor tenue toegevoeg en hadde ze sjoon sjeepkes oppe kop.

Ten tieje van de residensie van Maan waerde d’r vief aovende aan ein sjtok Vastelaovend gevierd veur de jeug. De Kaketoes mit haore grote veurgenger Bair Cox bezochte troew de “Kits-Uulkes”.

De toegetraoje “Scoutingboys” veulde zich al beheurlik volwasse, zo kwaam ’t det sie anger toekomsplanne krege en mer get gaer onger de vleugels van die grote Kaketoes oet wolle